Developer pamultahon sa Talisay

Posibleng pamultahon sa kagamhanan sa Talisay ang developer sa Villa Ferenzie Subdivision sa barangay Linao nga nahimutang sa taas nga bahin sa maong lugar tungod sa pagpadayon niining pag-develop bisan og aduna na silay suspension order gikan sa dakbayan.

Gimanduan sa siyudad ang Crown Asia Developer sa Villa Ferenzie nga mosunod sa mga "mitigating measures" nga gipabuhat kanila sa siyudad una sila makapadayon sa ilang pag-develop sa lugar.

Base sa surpresang pakisusi nga gipahigayon sa City Planning and Development Coordinator (CPDC) nakita nga ang nahisgutang developer padayon gihapon kining nagpatrabho sa lugar bisan og duna nay temporaryong suspension order ug wala kini mopatuman sa "mitigating measures".

Tungod sa pagbaha og lapok diha sa maong lugar hinungdan nga miluwat og kamanduan ang siyudad nga ipahunong una ang Crown Asia sa ilang gipahigayong construction.

Si Christine Homez, labaw sa CPDC nagkanayon nga ang kagamhanan sa dakbayan magpahigayon og higpit nga pag-monitor sa mga development project sa siyudad ug ipatuman ang police power ngadto sa mga developer nga makalapas sa balaod.

Si Jojo Concio, project engineer sa Villa Ferenzie nagkanayon nga gihuman lang nila ang ubang construction sa ubos nga bahin sa subdivsion ug hangtud karon dunay padayong negosasyon sa maong proyekto.

Si Concio nagkanayon nga gipakita niya sa inspection team sa siyudad ang ilang gibuhat nila karong construction.

Show comments