6-ra ibilin sa Magellan's cross

Magpabilin ang dili mominos unom ka mga manindahay og santos ug uban pang mga souvenir items sa Sr. Sto. Niño diha sa kilid nga bahin sa Magellan's cross ug ang mga manindahay lang og pagkaon maoy obligahon sa pagpahawa gikan sa maong lugar.

Gibutyag ni City Administrator Francisco Fernandez nga ila nang napadalhan og notisya ang maong dul-an sa 20 ka mga vendors sa maong lugar ilabi na gyud ang mga manindahay lang og pagkaon nga bag-ohay lang sa lugar sa pagbiya sa dapit.

Kini tungod kay ipatuman na sa siyudad ang pagpa-demolish sa ilang mga paninda karong sunod semana ilabi na kun dili gihapon makakuha og positibong resulta ang himuong negosasyon karong Lunes.

Matud ni Fernandez ila hinuong paningkamutan nga mahatagan og relocation site ang mga vendors nga manindahay og pagkaon sa laing lugar gawas diha sa Magellan's Cross nga nakahatag og kasamok sa lugar nga giila isip usa sa mga tourist destination sa Sugbo.

Nahukman nga ipabilin ang mga manindahay og souvenir item sa lugar nga mga karaan na usab kaayong manindahay gumikan kay tipik ug kabahin na kini sa kultura sa lugar.

Nasayran nga gihatagan lang og tagal sa mayor kutob sa liwas sa Sinulog ang maong mga manindahay human mihangyo kini dihang ipatuman unta ang demolisyon tungod sa reklamo sa Parks and Playground Commission sa kasamok na sa lugar nga gihugpaan na og daghang mga vendors.