P5 mil cellphone load sa Talisay

Gipamatud-an sa pipila ka mga konsehal sa Talisay City nga P1,000 ra ang labing dakong magasto nila sa "load" nga cell card sa ilang celpone matag buwan.

Si Konsehal Alan Bucao nagkanayon nga sukad niadtong 2004 hangtod 2005, ang tulo ka cell card nga tag P300 matag buwan mao ray iyang makonsumo.

Busa alang kang Bucao nakadaginot siya sa P2,500 nga cell card allowance nila matag buwan sa konseho.

Susama usab niini ang panglantaw ni Konsehal Emil Go, ang usa ka negosyanteng konsehal kinsa giingong maoy labing kusog mogamit og celphone labaw sa tanang konsehal sa Talisay.

Maoy hinungdan nga dihang gidiskute na sa konseho ang bahin sa P5,000 nga allowance sa cell card matag buwan alang sa mayor, bise mayor, mga konsehales ug department heads niadtong Huwebes, sila si Bucao, Go ug konsehal Ignacio Luis Jordana mipadayag sa ilang pagsupak.

Apan wa kini mosaler tungod kay mas daghan ang mipabor sa pagpalabang sa maong resolusyon.

Karon misangpot kini sa hulga sa ubang tigpaniid nga ipaimbestigar sa Ombudsman ang maong balaod tungod kay alang kanila usa na kini ka pag-usik-usik sa kuwarta sa katawhan.

Usa sa mga mipadayag sa iyang kahimangod niini mao si kanhi Cebu Customs Collector David Odilao Jr. kinsa taga Talisay ug miingon nga dili niya gustong ang iyang anak nga si Konsehal Bernardo Odilao, mopahimulos ning maong P5,000 nga cell card allowance nga gibalaod sa konseho sa dakbayan sa Talisay.