Anak sa negosyante giunay og pusil sa ilang sikyu

Anak sa usa ka negosyante giunay og pusil sa gwardiyang gipabantay sa ilang establisamento kini human mamugos sa pagpagawas sa ligid sa sakyanan diha sa compound sa Global Classic Design sa barangay Cabancalan sa dakbayan sa Mandaue sa milabay'ng adlaw.

Ang napusilan mao si Mark Andrew Lim, 26 anyos, minyo nga nagpuyo sa barangay Tingob sa maong siyudad, samtang gitumbok nga nakapusil kaniya mao si Florence Patega,hingkod ang panuigon, taga Sacris Road sa barangay Maguikay sa mao gihapong siyudad.



Si SPO3 Gil Roco, imbestigador sa Presinto 4 sa Casuntingan Police Station mitug-an sa Banat News nga gipugngan sa suspek ang biktima nga dili mapagawas ang mga ligid subay usab sa kamandoan sa amahan sa biktima.

Gikatahong nasuko ang biktima ug giduot ang guwardiya sa sulod sa compound maong napugos kini sa pagpusil.

Dali nga gidala ang biktima sa Cortes General Hospital sa dakbayan sa Mandaue ug gibalhin kini sa Chong Hua Hospital sa dakbayan sa Sugbo.

Hinuon si SPO3 Roco miingon nga ang suspetsado ang mitahan usab sa usa ka Jaime Ceniza human sa insidente kinsa mao usab ang nagtugyan niini ngadto kanila.