3-anyos wa mabantaying nahulog sa septik tank

Anaa sa kritikal nga kahimtang ang 3-anyos nga batang lalaki nga nahulog sa septik tank sa ilang silingan niadtong miaging hapon didto sa dakbayan sa Lapu-Lapu.

Ang biktima mao si James Ryan Silva Duran nga anak sa magtiayong Ruel ug Stephanie nga pulos hingkod ang panuigon ug nagpuyo sa sitio Santa Maria, barangay Pusok sa maong siyudad.

Sa imbestigasyon nga gihimo nila ni Inspector Francisco Baguio, hepe sa Homicide Section sa kapolisan sa maong dakbayan nasayran nga nanglaba ang amahan atol sa maong insidente.

Matud pa ni Inspector Baguio nga nataligam-an sa amahan ang bata nga nagdula ug didto kini mopaingon sa bakanteng panimalay sa ilang silingan.

Dugang pa niya nga bukas ang lima ka tiil nga gilawomon sa septik tank nga gipanag-iya ni Fely Pino nga may tubig, hangtod kalit kining nahulog sa lungag.

Ang silingan nga namanday nga maoy nakamatikod maoy dali nga nakatabang sa biktima ug nakatawag og ambulansiya sa Emergency Rescue Unit Foundation (ERUF) kinsa maoy midala niini sa Mactan Doctors Hospital.

Ang mga doktor padayon pa nga nag-atiman sa biktima ug gisuta karon ang gibug-aton sa kasaypanan sa tag-iya sa septik tank nga nahulgan niini.