Kawatan nadugta ibabaw sa kisame

Usa ka gidudahang kawatan napalgang nadugta na ibabaw sa kisame sa ikaduhang andana sa usa ka abandonadong balay diha sa Nasipit, barangay Talamban ning dakbayan niadtong nakalabay'ng Huwebes sa hapon.

Ang maong lalaki nga miburot na og milagom ang pamanit gibana-banang dunay gitas-ong 5'4, nagsuot og itom nga t-shirt ug shorts nga camouflage apan walay nakit-ang ID o ba kaha magtumbok sa pagkatawo sa biktima.

Base sa gihimong imbestigasyon sa Homicide Section ang duha ka mga anak sa tagbalay nga si Joy Solera maoy nakakita sa duha ka tiil sa biktima nga migimaw gawas sa kisame diha sa 2nd floor.

Daling gipahibalo sa mga bata ngadto sa ilang amahan ang nakaplagan sa karaang balay ug dihang gisusi usa kini ka tawong nagsugod na og kadugta.

Dako ang pagtuo sa mga molupyo ug kapolisan nga kapin tulo na ka adlaw ang biktima diha sa kisame sanglit nanimaho na kini.

Matud pa ni PO1 Julius Mabunay sa Homicide Section nga dunay narekober nga usa ka sakong dunay sulod nga mga pinutol nga wire tupad sa patay'ng lawas sa biktima.

Gituohan karon nga posibleng nangawat og mga wire ang biktima nianang higayona apan wala makabantay nga live pa ang linya sa kuryente sa maong balay hinungdan nga nakuryentihan kini.

Ang biktima dunay dakong paso nga nasunog diha sa walang palad nga gituohang mipilit sa livewire nga nakaingon sa kamatayon niini samtang namutol sa mga wire diha sa maong kisame.

Gawas sa paso sa palad walay laing nakitang timailhang 'foul play' diha sa patay'ng lawas niini nga karon gidala na sa Cebu Rolling Hills Memorial Chapels sa dalan A.S. Fortuna ning dakbayan.