Public hearing sa ordinansahon nga mo-regulate sa anti-TB drugs giisnab

Walay bisan usa ka mga nanag-iya og botika mitambung sa gipahigayon nga public hearing sa giduso nga ordinansahon sa tsirman sa Committee on Health, konsehal Cristopher Alix kabahin sa pag-regulate sa pagpamaligya og mga Anti -TB drugs ngadto sa mga pasyente ilabi na kun walay prescription kun resita gikan sa doktor.

Tumong unta sa maong gipatawag nga public hearing niadtong miaging Miyerkules sa hapon atol sa sesyon sa konseho aron pagpagawas sa baruganan sa maong mga drug- owners kabahin ning maong laraw.

Bugtong mitambong sa maong public hearing mao lang ang City Health Officer nga si Dra. Fe Cabugao nga mipadayag og dakong pag-uyon sa maong balaodnon.

Kini tungod kay gibarugan ni Cabugao nga tinuoray'ng daghan ang mga botika dinhi sa dakbayan ang mobaligya og mga anti TB drugs bisan walay resita nga ipakita ang pasyente gikan sa doktor.

Gipadayag ni Cabugao nga makadaot sa panglawas sa usa ka tawo ang pagpataka og inom og drugas ilabi na kun wala kini mokunsulta sa doktor.

Gipadayag ni Ester delos Reyes secretary sa Sangguniang Panlungsud nga daghan sila og gi-imbitar nga mga drug store aron motambong sa maong public hearing apan walay bisan usa ang mitambong niini nga nagpasabot nga dili interesado sa maong ordinansa.