Pekeng dokumento's mga titser mikatap

Gipaluyohan sa mga sakop sa hunta probinsyal sa Sugbo ang gilusad karon nga kampanya sa Professional Regulations Commission batok niadtong mga magtutudlo nga mugamit sa peke nga dokumento.

Si Bokal Victor Maambong miingon nga kinahanglan gayud nga paluyohan kining kampanya karon sa PRC.

Matud pa ni Maambong nga adunay taho nga ilang nadawat nga human sa ipahigayon nga board examination adunay pipila nga nagpaabot sa resulta duolon og mga tawo nga mutanyag og tabang apan mangayo kini og dakong kantidad.

Kadaghanan kanila giingon nga mangayo og labing menus P10 mil ngadto sa P25 mil matag aplikante.

Kadaghanan kanila mupatuo nga adunay koneksyon sa buhatan sa PRC nga mangita'g paagi aron sa ingon maseguro nga sila makapasar sa gihimong examinaton.

Midugang si Maambong nga kon adunay mapakita nga dokumento ang usa ka tawo nga nangayo og dakong kantidad adunay dakong posibilidad nga minao-mao kini og dili tinuod.

Samtang dako kaayo ang kwarta nga pangayuon kanila dili usab tinuod nga mausab ang resulta sa gipahigayon nga examination.

Nadeskubrehan sa kadagkuan sa PRC sa miaging tuig nga adunay mga magtutudlo nga naghupot sa peke nga lisensya.

Pipila gani kanila gikan sa nagkalain-laing probinsya sa Central Visayas.

Hinoon aduna nay aksyon nga gihimo ang PRC niini pinaagi usab sa pakig-alayon sa kadagkuan sa Department of Education.