Gikan sa Bilibid gipatay

Usa ka tawo nga nakapatay og kanhi binilanggo sa National Bilibid Prison (NBP) sa Muntinlupa gipatay usab pipila pa lamang ka adlaw gikan sa iyang pagpauli human makalaya.

Ang pagpamusil nahitabo alas 7 pasado ang takna sa miaging gabii sa Proper Mabasa, lungsod sa Argao.

Ang biktima mao si Benjamin Solis, 36 anyos, ulitawo ug ex-convict nga nagpuyo sa nahisgotang dapit.

Si PO1 Lito Rivera ug PO1 Elias Pelayo nga maoy nakatubag sa maong alarma miingon nga kapin pa lamang sa usa ka semana nga nahiuli ang biktima.

Dugang pa nila nga didto sa gawas sa ilang panimalay ang biktima ug gitawag unta kini sa igsuon alang sa ilang panihapon.

Apan gisugat kini sa wala mailhing lalaki nga nagdala og armas ug gipusil niini ang biktima sa makadaghang higayon ug namatay gyod.

Sa dugang nilang nahipos nga kasayuran nga ang biktima posible nga gipanimaslan sa mga paryente o may nagdumot niini nga maoy hinungdan nga gipusil patay.