Davide dudang katuman isip electoral reform boss

Duda si Mayor Tomas Osmeña kun epektibo bang makapatuman si kanhi Chief Justice Hilario Davide Jr. sa bag-ong tahas nga gisangon kaniya ni Presidente Gloria Arroyo isip Presidential Adviser on Electoral Reforms.

Kini tungod kay matud ni Osmeña walay mahimo ang mga ipasupot nga mga maayong pahimangno ni Davide ilabi na kun dili maminaw niini ang mga hingtungdang opisyal sa Commission on Elections (COMELEC).

Pipila sa gitumbok ni Osmeña mao ang kasong iyang gisang-at batok sa usa ka lokal nga pamantalaan kabahin sa pagdili niya niadtong milabay'ng eleksyon nga makabutang og advertisement sa iyang kandidatura nga hangtod karon wala pa gyud maresolbar.

Ang laing gireklamo ni Osmeña mao ang kaso usab batuk kang kanhi Mayor Alvin Garcia nga maoy kaatbang niya sa milabay'ng eleksyon nga nagpatuyang lang og pa-advertise sa lokal nga mantalaan matag adlaw dihang nagdulong pa ang eleksyon apan hangtud karon wala gihapoy desisyon.

Kun si Osmeña ang pabut-on mas maayo nga hatagan na lang og kaugalingong katungod ang Comelec nga makapatuman sa mga kaugalingon niining programa ug reporma sa maong ahensiya.

Apan alang kang Osmeña mas maayo na lang kay si Davide ang natudlo sa maong posisyon nga gihulagway sa mayor nga dunay igong kasinatian ug katakus nga moserbisyo isip usa sa mga adviser sa presidente.