Martinez 'apil' sa tulis gikataw-an ni Junnie

Gikataw-an lang ni kanhi Kongresista Celestino "Junnie" Martinez ang pasangil sa usa ka nagpailang Joel Sumabong nga nalambigit ang ilang pamilya sa dagkung krimin sa Sugbo.

Kini ang reaksiyon ni Martinez human gitumbok nga sila ang gipasabot nga politiko sa VCD ug suwat nga gipakatap sa nagpaila nga si Sumabong.

Si Sumabong usa sa mga suspek sa pagtulis sa Land Bank sa lungsod sa Bogo sa niaging tuig diin kapin sa P10-milyones ang nakuha nga salapi.

Matud pa ni Martinez nga bisan pa og hatagan sila og kopya sa maong VCD, iya lang kining ilabay sa basurahan.

Nagtoo hinoon si Martinez nga politika ang motibo sa maong pasangil sanglit nagkaduol na usab ang eleksiyon.

Iyang gipahibawo nga ang iyang anak nga si Bogo Mayor Celestino "Tining" Martinez III ang padaganon sa pagka-kongresista sanglit ang asawa nga si Kongresista Clavel Asas-Martinez katapusan naman sa iyang termino ug dili na makapapili pag-usab.

Wala hinoon gibutyag ni Martinez kon kinsa ang nagpaluyo sa maong propaganda batok sa ilang pamilya.

Apan nasayran nga ang pamilya ni Daanbantayan Mayor Maria Luisa Loot ug bana niining si Sr.Supt. Vicente Loot, ang hepe sa Cebu Police Provincial Office, mao lang ang ilang gikaaway karon sa politika.

Lakip sa gihimakak ni Loot ang pasangil nga ilang gihulga ang kinabuhi sa pamilyang Loot.

"Unsa ma'y ilang atraso sa amo nganong patyon man namo," nagkanayun ang kanhi kongresista.

Giklaro ni Martinez nga wala siya kaila ni Sumabong ug wala usab siya nasayud kon kaila ba ang iyang anak nga mayor sa maong tawo.

Si Sumabong gikatahong nagpakatap og mga VCD ug nagpahibawo sa ilegal nga kalihukan sa mga Martinez.

Giingong napugos siya karon sa pagpatim-aw gumikan sa iyang kahiubos sa pamilyang Martinez nga iyang gisilbihan isip kumander sa ilang mga goons.