Mga aloy gikan customs bodega gipatimbang

Gipailawom karon sa imbestigasyon ang usa ka port police ug usa ka guwardiya sa Cebu Ports Authority human makit-ing "nanghakot" sa mga scrap aluminum ug mga puthaw sa nasunog nga Customs building niadtong milabay'ng gabii ug giingong mipatimbang niini sa usa ka junkshop.

Ang giimbistigar giilang sila si Corporal Adolfo Abrigana ug gwardiyang si Ricky Teves.

Ang chief operation sa CPA police nga si Joshua Pantoja sa pakighinabi sa Banat News nga dunay guwardiya sa usa ka estabilisamento sa Pier 5 ang mitawag sa Mobile Patrol Group ug misumbong kalabot sa duha ka tawong luwan sa usa ka multicab patrol nga may markang CPA ang nanghakot og mga scrap metals sa nasunog nga bodega pasado alas 3 sa kaadlawon kagahapon.

Usa ka scraps buyer nga giila lang nga Lolong diha sa Pier 5 maoy gipukaw sa mga sakop sa MPG kung siya bay nakapalit sa maong mga puthaw apan gipanghimakak kini ni Lolong sumala pa ni Pantoja.

Diha na lang nakit-an ang gikatahong scrap metals nga gisulod sa sako ug gibana-banang 30 ngadto sa 40 ka kilong aluminum sa "center island" sa kalsada luyong bahin sa gibantayan sa gwardiyang misumbong sa MPG.

Sumala pa ni Pantoja nga mihimakak si Abregana sa pasangil kay sugod sa alas 2 hangtud alas 5 sa buntag diha ra sa iyang buhatan ang polis, apan si Teves maoy nagdala-dala sa multicab human ihatud si Abregana niini.