Si SPO1 Wilfredo Catorza sa pakighinabi sa The Freeman/Banat News nagkanayon nga ang sako nakit-an dili layo diin makaplagi ang patay'ng lawas sa biktimang si Jennelyn Soreño.
Nagduda karon ang kapolisan nga dunay koneksiyon isip ebidensya ang maong sako sa krimen apan gikatakda pang ipailawom ang maong buhok sa eksaminasyon ug sa uban pang ebidensya nga nahipos diha sa patay'ng lawas sa biktima.
Ang Liloan police dunay tulo ka mga tawong giimbitahan aron makuhaan og impormasyon kabahin sa maong kaso apan giangkon sa kapolisan nga wala pa gyud silay klarong suspek sa pagkakaron. Apan dako ang pagtuo nga sabog sa gidiling drogas ang mihimo sa krimen.
Nahibaw-an nga diha sa maong lugar daghang mga panimalay ang magpunay og pasalida og malaw-ay nga palabas bisan daghang mga batan-ong manan-aw sumala pa sa kapolisan.
Samtang gipanghimakak sa kapolisan nga miikyas ang amahan sa biktima nga si Danilo sukwahi sa naunang nanggawas nga pagduda dihang miuli kini sa ila gikan sa police station niadtong Martes human sa interogasyon.
Ang biktima napalgang patay nga nagkaob diha sa baybayon ug may timailhang gilugos kini una pa patya pinaagi sa pagtuok o ba kaha pagtabon sa baba una pa kini gilabay diha sa dagat diin kini mahunasi pagkabuntag.
Ulahing nakit-ang buhi ang biktima Lunes sa gabii samtang nagtan-aw og telebisyon sa silingan apan wala na kini makauli sa ilang balay.
Si Mayor Maria Anne Sevilla sa pakighinabi sa usa ka lokal nga sibyaanan mimando sa kapolisan sa iyang lungsod sa pagpadali sa pagkasikop sa mga responsable sa maong krimen.
Giangkon sa mayor nga naukay ang iyang lungsod sa maong balita, samtang giangkon usab niini sa samang interbyu nga susama sa ubang kalungsoran ang pagkuyanap sa iligal nga drogas diha sa ilang lugar nakahatag usab kaniya og problema.