Gibalik na lang sa agi luwan sa ambulansya sa Toledo District Hospital ang patay'ng lawas ni Breddece Batomalaki, 36 anyos, human mabugtui sa iyang ginhawa samtang gidali og dala ngadto sa Vicente Memorial Medical Center.
Gitumbok nga midunggab sa biktima mao si Wilfredo Encarquis, hingkod ang panuigon ug silingan sa biktima.
Si i SPO4 Edgar Noel sa Toledo police station mitug-an sa Banat News nga base sa imbestigasyon ang biktima kasamtangang nagtan-aw og cable TV sa may kapilya sa San Juan sa nahisgutang dapit dihang kalit nga miabot ang suspek.
Gikatahong way daghang pangutana kalit nga giatake sa suspek ug gihansakan sa tuong tiyan si Batomalaki kinsa wala makamatikod sa pag-abot sa suspek ug dali usab nga miikyas.
Daling gidala sa TDH si Batomalaki apan gumikan sa grabeng igo niini sanglit naputol diha sulod sa iyang tiyan ang kutsilyo, girekomendar kining ibalhin sa VSMMC. Apan dangtan og pila ka gutlo nakabsan gihapon kini sa kinabuhi samtang nagpadulong pa lang sa maong tambalanan.
Gisubay na karon sa kapolisan kun unsay motibo sa suspek sa pagdunggab sa biktima.