Marked money nadala sa pusher

Usa ka gidudahang bigtime drug pusher ang nakaikyas sa gihimong buybust operation sa kapolisan sa lungsod sa Consolacion sa milabay'ng adlaw apan nadagit ang kuwarta sa mga polis.

Giila ni SPO3 Joseph Yongco ang suspek kinsa idlas nga nakadagan mao si Joffel Pepito, hingkod ang panuigon ug molupyo sa barangay Tilhaong, sa nahisgutang lungsod.

Sumala pa ni Yongco ang grupo ni SPO3 Raymund Enriquez mihimo og buybust operation batok sa suspek kinsa notadong pusher sa ilang lugar niadtong milabay'ng adlaw ginamit ang P500 nga marked money.

Tuod man nakapalit ang mga polis og shabu sa suspek kinsa miabot nga nagsakay og motorsiklong kolor puti, apan giingong nakamatikod kini nga polis ang iyang kustomer maong dali kining mikaratel og dagan palayo human madawat ang P500 ug natunol ang tulo ka dagkong pakete sa gidudahang shabu.

"Nakabantay siguro to siya nga polis ang mipalit niya maong daling nidagan, nabiyaan gani niya iyang motor," asoy pang Yongco.

Ang suspek sa pagdali wala na makahuna-huna sa iyang Yamaha DTR 200 nga may plakang GK-4070.

Si Yongco mitug-an nga usa si Pepito sa 15 ka mga gidudahang drug pushers nga nabutang sa order of battle sa Consolacion.

Sa maong lungsod naghitak ang drugas gumikan sa gihulagway nga hinay kaayong kampanya sa kapolisan batok niini. Gani pila na ka hepe ang nabutang sa maong lugar apan wala pa gihapon matagbaw ang kadagkuan sa kapolisan sa ilang pakigbatok sa drogas diha sa maong lungsod.