Pagputol og kahoy 'higpitan

Mimando ang kadagkuan sa Department of Environment and Natural Resources sa pagkanselar sa tanang mga kontrata ug kasabutang may labot sa kalasangan sa Rehiyon VII karong tuiga.

Ang maong lakang lakip sa tinguha sa pagsakop sa mga kwestiyonableng naggunit og nagkadaiyang forest contracts.

Ang maong mando gipagawas ni Secretary Michael Defensor sa dihang wala pa siya mikanaug sa iyang pwesto sa sugod ning buwana.

Apil usab nga nalakip sa maong kamanduan ang pito pa ka mga Rehiyon 1, IV, V, VI, VII, IX ug Caraga.

Gimando ni Defensor ang tanang mga Regional Directors sa nahisgotang mga lugar sa pagrebokar sa mga nag-operate nga Industrial Forest Management Agreements (IFMA), Industrial Tree Plantation Lease Agreement (ITPLA), Socialized Industrial Forest Management Agreements (SIFMA) ug Community-based Forest Management Agreement (CBFMA).

Ang CBFMA usa ka kontra nga mahimong ma renew human sa 25 ka tuig, gihatag sa DENR ngadto sa usa ka organisayon o kooperatiba, aron ang mga miyembro mahatagan og higayon sa paggamit ug pag-ugmad sa nahisgotang dapit sa mga lasang.

Dinhi sa Central Visayas, nga naglakip sa mga probinsyang Cebu, Bohol, Siquijor ug Oriental Negros, adunay 183 ka mga CBFMA's, ikaduha sa gidaghanon kompara sa Rehiyon X nga adunay 297.

Ang DENR mihatag og 1,769 CBFMA's sa tibuok nasud nga naglangkub og 1.6 milyones ka hektarya.

Ang IFMA usa ka kasabutan tali sa DENR ug usa ka kwalipikadong aplikante nga tugyanan og ekslusibong katungod sa pagprotiher, paggamit ug pagdala sa usa ka lasang nga gilatid sa kasabutan sulod sa 25 ka tuig.