Lapu-Lapu ug Cordova police maghiusa

Ang Mactan Island Unified Force kun paghiusa sa puwersa sa kapolisan sa Lapu-Lapu ug Cordova mao karon ang gitinguha ni Superintendent Louie Oppus nga giuyonan usab ni Mayor Arturo Radaza.

Gipaabot na lamang ni Superintendent Oppus ang tubag sa Camp Crame alang sa katumanan niining maong niyang tinguha.

Si Oppus nga gikahinabi sa Banat News kagahapon miingon may pag-uyon na usab ni Mayor Arliegh Sitoy sa inisyal nilang panagsulti niini.

Giklaro ni Oppus nga ang maong tinguha sa paghiusa sa puwersa sa kapolisan sa Lapu-Lapu ug Cordova unang gisugyot sa kanhi mga opisyal sa kapolisan sa Lapu-Lapu ug gibuhi pagbalik sanglit iyang nakita nga gikinahanglan na gayod kini karong panahona.

Matud pa ni Oppus nga makapalambo sa pagpatuman sa kahapsay ug kalinaw sa Lapu-Lapu ug Cordova ang paghiusa sa puwersa sa kapolisan sa duha ka dapit sanglit maisip man kining usa lamang ka isla sa Sugbo.

Dugang pa ni Oppus nga ang Mactan Island Unified Force sa Lapu-Lapu ug Cordova dili gayod tuyo ang ilang pagbulag sa Cebu Provincial Police Office (CPP0) kon dili ang nag-una gayod niyang tumong niini mao ang paghiusa sa kapolisan sa pagsumpo sa kriminalidad.

Matud pa niya nga ang mao niyang tinguha iyang na nga gipadayag kang 6th District Representative Nerissa Soon Ruiz ug mipadayag na usab sa pagsuporta niini.

Nagkanayon usab siya nga gipresentar na niya kini ngadto sa Police Regional Office (PRO-7) ug kang CPPO Provincial Director Vicente Loot ug positibo usab ang gipadayag nga reaksiyon.