Tri-media sa Cebu nagbansay paggamit og armas

Mga sakop sa media dinhi sa Sugbu malampusong mitapos sa usa ka adlaw nga pagbansay-bansay alang sa responsableng paggamit og armas ilawom sa pagtudlo sa National Rifle Association(NRA) sa Estados Unidos sa Houston, Texas ug Armscor niadtong nakalabayng Sabado.

Ang maong lakang gipasiugdahan sa pangulo sa Kapisanan ng mga Brodkaster ng Pilipinas nga si Edward Abad ug pangulo usab sa Cebu Federation of Beat Journalist nga si Joy Tumulak.

Bisan dyutay ra ang nakatunga kumparar sa aktwal nga gidaghanon mga tigbalita sa Sugbu gihulagway kini sa duha ka grupo nga malampuson.

Si Reynaldo Duterte Abad, kinsa usa ka Grandmaster sa United States Practical Shooting Association ug maoy Chief Fire Arms instructor sa Elrey Incorporated sa Texas, USA maoy mihatag sa Basic Gun Handling,Safety.

Samtang ang marketing executive sa Armscor nga si Joel Concepcion maoy mihatag og libreng mga bala ngadto sa mga sakop sa media alang sa aktwal nga firing lessons diha sa Kamagong Gun Club sulod sa Central Command.

Pipila sa mga nanambong mga field reporters, kolumnista, komentarista ug mga photographers gikan sa nagkadaiyang mga media outfit sa Sugbu.Lakip na ang tulo ka mga sakop sa media nga gisuwayan og patay pila na ka bulan ang nakalabay.

Human sa tibuok adlaw nga pagbansay-bansay nakadawat ang mga partisipante og mga certificates nga gihatag sa Kamagong Gun Club nga linagdaan sa NRA instructor nga si Reynaldo Abad.