4 tulisan pulos armado nasikop

Higpit karon nga gibantayan sa mga sakop sa Mobile Patrol Unit (MPU) sa kapolisan sa dakbayan sa Mandaue ang upat ka armadong lalaki nga mitulis sa pito ka pasahero sa PUJ.

Ang pagpanulis nahitabo alas 5 pasado ang takna sa buntag niadtong miaging Domingo sa dalan A.C. Cortes Avenue sa barangay Looc, Mandaue.

Ang Mobile Patrol Unit, Special Weapon and Tactic (SWAT) ug ang Theft and Robbery Section (TRS) maoy nagtinabangay sa pagtubag sa maong alarma.

Si Jean Tabera, 28 anyos, dalaga nga taga Room 203 sa Monville Zusa Compound sa Don P. Rodriguez, Capitol Site sa dakbayan sa Sugbo nga usa sa mga biktima midangop sa Presinto 5 human sa insidente.

Matud pa ni Tabera nga gikahinabi sa Banat News nga ang upat ka tulisan nga pulos batan-on ug pulos naghupot og mugbo nga matang sa armas misakay sa giluwanan nilang PUJ sa paghidangat sa eskina A.C. Cortes Avenue ug Plaridel St sa Alang-Alang sa maong dakbayan.

Matud pa niya nga gitionan sila sa armas ug mideklarar ngadto kanila nga tulis ug gikuha gayod ang ilang mga cellphone, salapi ug mga alahas ug nagdali sa pagpanganaug sa paghidangat sa tiilan sa 1st Mactan Mandaue Bridge.