Killer ni Allan gi-death penalty

Killer sa photojournalist sa The Freeman ug Banat News gipahamtangan kagahapon og silot kamatayon ni Regional Trial Court Branch 5 Judge Ireneo Lee Gako, Jr. human makumbinsir sa gipamahayag sa mga testigo sa krimen nga nahitabo niadtong Nobiyembre 27, 2004 diha sa North Reclamation Area.

Ang akusadong si Edgar Belandres kalmadong midawat sa iyang sentensya.

Nakumbinsir si Gako sa testimonya sa mga testigo gumikan kay bisan imposibleng makahinumdum ang maong mga testigo sa dagway sa gunman tungod kay kausa ra man ni nila nakita mas gihatagan ni Gako og gibug-aton ang pag-angkon ni Belandres nga iya kadtong numero nga mipatik sa cellphone ni Dizon nga nag-awhag nga adto sila magkita sa gikahitaboan sa krimen.

Dugang pa niini mao nga walay napresentar nga ebidensya ang depensa nga dunay kaligutgot ang mga testigo aron tumo-tumoan si Belandres og pasangil, gihatagan usab og gibug-aton sa huwes ang ulahing nadungog nga gipamulong ni Dizon nga nag-ingon og "ayaw part" ngadto sa gunman, nga timaang nakaila gyud si Dizon sa mipatay kaniya.

Si Dizon ug Belandres parehong nagpuyo sa barangay Lorega-San Miguel ug gikatahong dugay nang managkaila.

Sila si Faustiniano Doller, Epifanio Barcuma ug Alma Doller nga diha sa gikahitabuan nianang gabhiona diin si Dizon nagbarug nga daw dunay gihuwat maoy nakasaksi dihang usa ka tawong naghelmet ang miduol ug kalit nga mipusil sa tigbalita.

Matud pa sa mga testigo sa dihang gipusil sa maong tawo si Dizon gihubo niini ang helmet ug gibalik lang kini og suot dihang misakay og balik sa motorsiklo. Niadtong gipangutana kung nakahinumdom ba sila sa nawong sa mipusil kang Dizon, ilang gitudlo si Belandres.

Human gibasa ang 19 ka pahina nga desisyon ni Gako nga "guilty' si Belandres ug kamatayon ang iyang silot nakahilak ang asawa ni Dizon nga si Amelina sa tumang paghangop sa desisyon nga iyang gipangandoy.

Sa pakighinabi niini sa Banat News mapasalamaton si Amelina sa Senyor Sto. Niño sa pagdungog sa iyang pag-ampo. Kini bisan pa nga kaniadto pa untang Disyembre 20 mabasa ang maong desisyon ug na-postpone kini human mihangyo ang akusado nga human na sa Pasko basahon.

Sa laing bahin, si Pedro Leslie Salva, abogado ni Belandres, miingon nga wala siya makuntento sa desisyon sa korte ug giplanuhan nilang moapelar.Si Belandres wala magpa-interview sa media samtang ang iyang lima ka anak nga didto usab sa korte nanghilak.

Ang abogado sa prosekusyon nga si Dante Ramos miingon nga malipayon sila sa desisyon ug dawaton nila ang apelar unya sa pikas kampo, kay kini angay lamang kay kamatayon man ang silot.

Si Dizon nakaangkon og tulo ka pinusilan sa iyang lawas. Nakapangayo pa kini og tabang sa mga tawo sa palibot. Nadala siya sa ospital apan nabawian kini sa iyang kinabuhi tungod sa kadaghan sa dugo nga nawala.