Hubo sa señor karon

Ipahigayon karong hapon ang tinuig nga kalihukan nga "Hubo sa Señior Sto. Niño nga ipahigayon sa adlawng Biyernes sa matag tapos sa kapistahan ni Señor Sto. Niño.

Usa ka santos nga misa ang ipahigayon karung alas 4:00 sa hapon diha sa Pilgrim Center sa Basilica Minore del Sto. Niño nga pagadumalahon ni Fr. Andres Rivera.

Ubos ning maong kalihukan gitakdang huboan sa iyang karaan nga sapot ang Sr. Sto. Niño aron diguon sa tubig una pa ilisan og bag-ong sinena.

Gipaabot nga hugopan sa liboan ka mga debotos ni Sr. Sto. Niño ang maong kalihukan karong hapon gumikan sa tubig nga idigo niini gituohan nga milagroso.

Kini maoy hinungdan nga hangtud karun pabilin gihapon nga gihigpitan ang seguridad sa palibot sa Basilica gumikan kay gipaabot nga liboan gihapon ka mga debotos ang motambong sa santos nga misa alang sa maong kalihukan og mosaksi sa himoon nga "hubo".

Ang Sr. Sto. Niño naila na kini sa pag-ayo niadtong mga tawong naghambin og lainlaing balatian pinaagi sa milagro.