Tulo ka 'kawatan' gi-shotgun sa sikyu

Duha ka gidudahang "kawatan" gi-shotgun sa gwardiya samtang naaktuhang nanguha og scrap metals ug mga piyesa sa transformers sa sulod sa yarda sa Visayan Electric Company sa barangay Ermita ning dakbayan apan nakapagan og usa kagahapon sa buntag.

Samdan sa ilang kalawasan ang mga biktimang sila si Joseph Flores 50, minyo, Gil Rosales, 50, minyo ug Antonio Torregosa, 37, minyo pulos mga molupyo sa Sitio Bato sa samang barangay, malinawon hinuong mitahan sa kapolisan ang gwardiyang si Negelo Paller, 28, human sa hitabo.

Si PO2 Edario Manatad imbestigador sa Homicide Section sa pakighinabi sa Banat News nga padulong na og ikyas sila si Flores ug Rosales dihang gipusil ni Paller gikan sa sulod.

Apan ang pagpamusil nakapagan kang Toregosa kinsa duol kaayo ang balay sa gikahitaboan.

Sa alegasyon sa suspek giingong naaktuhan niyang nangawat ang duha og mga scrap metals gikan diha sa sulod ug dihang iyang gipasalbahan wala mopatuo ang tulo ug padayon gihapong nangikyas hinungdan nga iya kining gipusil.

Apan ang duha ka gipasanginlang kawatan kusganong mihimakak sa pasangil batok kanila, matud pa nila nga nagbarog-barog ra sila diha sa maong lugar dihang kalit gipamusil sa suspek.

Dunay nakuhang mga pinutol nga mga kabilya, piyesa sa transformers sa VECO, baterya sa trak sulod sa compound nga giingong nabilin sa duha.

Giandam na karon ang kasong frustrated homicide batok sa suspek kinsa gipailawom kagahapon sa paraffin test samtang giturn-over sa suspek ang iyang service shotgun nga Armscor 12 gauge shotgun lakip na ang duha ka basiyo ug usa ka buhing bala niini.

Sa milabay'ng tuig usa ka lalaking molupyo usab sa naasoy'ng barangay ang napalgang patay sulod sa compound sa VECO, gituohang nangawat ang maong lalaki apan gidemalas nga mipilit sa high voltage nga kuryente ug namatay.