16 PATAY SA FLUVIAL PROCESSION SA LEYTE

Kung ang dakbayan sa Sugbu nagmaya kagahapon sa malampusong Sinulog 2006, nagsubo usab ang lungsod sa San Ricardo, Southern Leyte human 16 ka mga tawo kadaghanan mga bata ang nangalumos ug nangawala human motikyaob ang ilang gisakyang pumpboat nga misalmot sa fluvial parade kagahapon.

Sumala pa ni Chief Petty Officer Manolito Danselo sa Barangay Binit, San Ricardo Coast Guard Station pakighinabi sa The Freeman/Banat News ang M/B Sun Jay nga gipanag-iya ni Vice Mayor Fiel Culpa ang gigamit sa mga debotos nga miuban sa fluvial parade alang sa Senyor Santo Niño dihang natikyaob kini usa ka kilometro ug tunga ang gilay-on gikan sa Coastguard clearing sa barangay Binit.

Giingong overloaded ang maong pumpboat sanglit gitugutan lang kining makakarga og 60 ka tawo apan gituohang miabot kini og kapin 100.

Ang mga namatay gidala na sa pikas lungsod sa Pintuyan Municipal Hospital luwan sa usa ka bangkang de motor samtang gikahadlukang mas daghan pa ang wala pa marekober sumala pa sa kapolisan.

Gawas sa mga namatay dunay lima ka mga nangaangol samtang upat usab ang missing hangtud ning pagsulat sa balita.

Nasayran gikan kang Danselo nga kasagarang sakay sa bangka mga sakop sa drums and bugle corps sa usa ka lokal nga tunghaan bisan 40 lang ang makaya sa maong bangka.

Gibasol karon ni Danselo ang nag-organisa sa maong fluvial parade nga wala magpahibalo sa ilang kalihukan aron mabantayan ang gidaghanon sa mga sakay sa mga bangka.

Si Chief Petty Officer Leopoldo Barrios sa Liloan Coastguard Station sa Leyte sa pakighinabi sa Banat News nagkanayon nga duha ka helicopter sa Philippine Air Force gikan sa Mactan ang mitabang sa operasyon uban sa Philippine Navy alang sa rescue operations.

Matud pa ni Barrios nga nahunong pagkilom-kilom ang ilang operasyon gumikan sa pagkusog sa ulan ug pagdagko sa balod.