Hapon, 78, nalumos

Usa ka 78 anyos nga Japanese national nga naligo sa Maribago Beach Resort sa barangay Maribago sa dakbayan sa Lapu-Lapu gituohang nalumos.

Patay na nahaw-as sa dagat si Mitshuo Nacagawa nga temporaryong nagpuyo sa maong dapit.

Sa imbestigasyon nila ni Inspector Francisco Baguio ug SPO2 Rolito Jumao-as sa Homicide Section maoy ilang nasayran nga naglangoy-langoy ang biktima.

Matud pa nila nga gigamit niini ang paddle boat nga maoy giabayan sa iyang paglangoy-langoy sa dagat ug nagtaud usab sa nawong og snorkil aron makaginhawa bisan mosawom sa dagat.

Dugang pa nila nga ang swimming attendant sa nahisgutang beach resort nga sila si Elino Paquibot ug Dioscoro Paquibot nakamatikod sa biktima nga daw naglisod na sa paglangoy.

Dali kini nilang gitabang ug gidala sa Mactan Doctor's Hospital apan gideklarar kini sa mga doktor nga patay na nga nahidangat sa maong tambalanan.

Si PO2 Alcon Escozura nga gikahinabi sa Banat News miingon nga gipaubos sa autopsy ang patay'ng lawas sa biktima aron masuta ang hinungdan sa kamatayon niini.