Gipusil-patay sa gikainom

Usa ka lalaki ang gipusil patay sa silingang gikainom sa miaging kaadlawon diha sa Purok Tambis sa barangay Umapad, siyudad sa Mandaue.

Ang biktima giilang si Ronie Clareon, 33 anyos, ulitawo ug nagpuyo sa maong dapit samtang gitumbok usab ang silingan niini nga mipusil kaniya mao si Jordan Abrahan, 22 anyos, ulitawo.

Ang mga sakop sa polis nga sila si PO2 Cecilio Miñoza ug PO2 Ritchel Palitones maoy dali nga nakatubag sa alarma.

Sa imbestigasyon nga gihimo nila ni Miñoza ug Paletones sa Presinto 5 sa Opao Police Station samtang nag-inom ang biktima ug suspek miulbo ang panaglalis sa duha.

Nianang tungura mibunot ang suspek og wala matinong kalibre sa armas de fuego dayong tion niini sa biktima, apan dihang gikablit mikagar kini maong nakahigayon og dagan ang naulahi.

Apan sa ikaduhang kablit mibuto na ang armas ug diha mitugpa sa ubos nga bahin sa ilok niini hinungdan sa pagkahapla niini.

Pagkakakita sa suspek sa nahitabo sa biktima dali kining miikyas palayo samtang gidala sa mga silingan sa Mandaue City Hospital si Clareon diin kini gideklarar nga dead on arrival.