Norkis mopahulam og mga sakyanan sa Sinulog team

Mopahulam og pito ka mga sakyanan ang Norkis Group of Companies ngadto sa Sinulog Foundation aron magamit alang sa transportasyon atol sa pagpahigayon sa Sinulog mardi gras karung Domingo.

Ang managing head sa Legacy First & GA-VISMIN nga affiliated sa Norkis Group of Companies Melchor Mata mipadala og suwat ngadto kang bise mayor Michael Rama over all-chairman sa Sinulog 2006 kagahapon aron pagpahibawo sa ilang ikatampo sa maong kalihukan.

Pito ka mga units sa First Legacy Vehicle ang gipagamit sa maong kompaniya sa Sinulog Foundation sugod kagahapong adlawa ug hangtud sa Lunes sa alas 5:00 sa hapon pagka liwas na sa mardi gras.

Abagahon sa maong kompaniya ang tanang gastuhan sa gasolina ug ingon man ang mga drayber ug sa mga motumaw nga posibleng aksidente sa matag sakyanan.

Apan human sa kalihukan sa Sinulog dili na mopasalig ang maong kompaniya nga maoy moabaga sa maong mga gastuhan kun mapakyas og uli dayon ning maong mga sakyanan ang Sinulog Foundation.