Devotee city gibuksan na

Pormal nang gibuksan kagahapon sa alas 9:00 sa buntag ang Devotee City Center nga nahimutang diha sa may Plaza Independencia alang niadtong mga debotos ni Sr. Sto. Niño nga mamista senyor dinhi sa dakbayan apan walay kabanay nga kaabtan.

Gibutyag ni Cedric Tumulak, officer in-charge sa Devotee City Center nga sukad kagahapon sa alas 11 sa buntag mokabat na sa 200 ka mga tawo nga gikan sa lainlaing probinsya ang naka-check-in human kini nakaparehistro ug nakapresentar og mga kamatuoran sama sa trip ticket nga gikan sila sa lagyo nga probinsya.

Nasayran nga sa wala pa buksi ang maong sentro kagahapon sa buntag gipahigayon una ang hamubong programa nga gipasiugdahan nila ni Konsehal Jocelyn Pesquera, chairman sa Devotee City ug ingon man ni Konsehal Edwin Jagmoc.

Tumong sa maong programa aron pasalamatan ang tanang mga sponsors sa maong kalihukan sama sa Aboitiz nga maoy mipahulam og 50 ka mga container vans, MCWD nga mipaangay sa libreng tubig, Veco alang sa kuryente, ug Julies Bakeshop ug Universal Robina Corp. alang sa pagkaon ug kapulisan ug mga tanod, speed ug Citom alang sa pagpatunhay sa seguridad.

Ang Devotee City anaa na kini karon sa ika napulo ka tuig sukad sa pagkatukod niini niadtong 1996 sa panahon pa ni kanhi Konsehal Fe Mantua Ruiz.