Pa-seksi gidili sa Sinulog

Gipahimangnuan ni Bise Mayor Michael Rama, over-all chairman sa Sinulog 2006, ang mga contingent sa Sinulog mardi gras nga dili mogamit og mga seksi kaayong costume nga makahatag na og law-ay'ng talan-awon ngadto sa mga tawong mosaksi sa maong kalihukan.

Gitambagan ni Rama ang tanang mga contingent nga mosunod sa tukmang mga lagda nga gipatuman sa Sinulog Foundation.

Matud ni Rama ipatuman hinuon nila ang maximum tolerance kutob sa ilang mahimo aron lang gyud magmalampuson ang selebrasyon karong tuiga nga naila na dili lang dinhi sa nasud kun dili sa tibuok kalibutan.

Gipahibalo sab ni Rama nga dili siya buot nga ipa-ubos sa subsub nga pag-monitor ang mga sakop sa fraternity nga mo-apil sa maong parada sa Sinulog gumikan kay dili usab kini maki-angayon ngadto kanila.

Hinuon gipasalig sa bise mayor nga andam na ang seguridad sa tibuok palibot sa rota nga agian sa mardi gras karong Domingo gumikan kay gawas sa kapolisan nga ipakatap duna pay mga sakop sa Central Command ingon man mga rotc cadets ang motabang sa crowd control.

Kini wala pay labot sa mga anti crime volunteer groups ug mga tanod sa lain-laing barangay nga ipakatap sa kadalanan nga agian sa parada sa Sinulog.

Nasayran nga moapil ang Akrho sa parada sa Sinulog ug gani duna silay napulo ka entries alang sa Higante Category ug Float.

Nasayran nga dunay 41 ka mga contingent alang sa Sinulog Based (SB) ug Free-Interpretation (FI) Category ug tag 20 ka entries alang sa float ug higante ug siyam sa puppeters.