Dagkong props gidili na

Gidid-an ang mga contingent sa Sinulog mardi gras sa Domingo nga magdala og mga dagku kaayung props isip kabahin sa ilang presentasyon sa maong kompetisyon susama sa nahitabo niadtong miaging mga katuigan.

Gipahibalo ni Dolly Suzara, project director sa Sinulog Foundation, nga kuhaan nila og 20 puntos ang total score niadtong mga contingent nga magdala og dagko kaayong mga props.

Kini tungod kay gitugotan na lang karon ang mga contingent nga makadala og mga props nga igo lang nilang mabitbit ug madala gumikan kay ang naghinobra ka dagko nga mga props maka-apektar kini sa presentasyon sa mga contingent.

Gidugang ni Suzara nga mas gitutokan sa Sinulog karong tuiga ang pag-obligar sa mga contingent nga mo-perform og mga ritwal nga sayaw gikan sa alas 10 sa buntag ug pagka ala una sa hapon atol sa mardi gras.

Kini maoy tutokan sa lima ka mga judges nga pulos gikan sa kaulohan nga mga sakop sa Cultural Center of the Philippines ug sa National Commission for Culture and the Arts.

Gipahibalo sab ni Suzara nga mokabat lang ngadto sa 41 ang tanang mga contingent nga mosalmot sa Sinulog mardi gras sa Domingo human gitak-opan na ang pagpangrehistro niini niadtong miaging adlaw sa alas 5 sa hapon.

Dunay 19 ka contingent alang sa Sinulog Based (SB) Category ug 22 sa Free Interpretation (FI), samtang 20 ang sa Higante ug laing 20 ang sa Float og siyam ang sa puppeters ug ingon man dunay guest contingent gikan sa Pampanga.

Sugdan ang Sinulog mardi gras sa alas 9 sa buntag ug tapuson sa pagka alas 6 sa gabii.