Export sa Sugbo misaka bisan sa krisis - kolektor

Mitala og 35 porsiyentong pagsaka ang export sa Sugbo bisan paman sa nahitabong krisis sa politika sa milabay'ng tuig, ang maong dugang export nakapasulod og 1.867 bilyones dolyares.

Kini maoy pangangkon ni Cebu Port Export Division chief Jessie Llanos kinsa mipahibalong mikabat sa 5.5 bilyones ka kilong mga goods nga mas taas pa og 1.433 bilyones ka kilo kung itandi sa milabay'ng 2004.

Nunot niining kalambuan malaumon si Cebu Customs Collector Maria Lourdes Mangaoang nga mas motaas pa ang export karong tuiga gumikan sa gipakitang kabaskug sa milabay'ng eksportasyon.

"The Cebu export industry's performance and the strenghtening of the peso compared to the dollar are positive indicators. This should offset the ill effects of additional consumer taxes on the ordinary tao's purchasing power and lead to more local market activities this year,"asoy pang Mangaoang.

Nakita ni Mangaoang ang pipila sa mga lokal nga kalambuan sa Cebu susama sa giplanong pagtukod sa Cebu International Convention Center, gipakusgang programa sa turismo ug mga multi-milyones nga proyekto sa power plants sa Naga.

Sumala pa ni Mangaoang ang lokal nga kalambuan mangahulugang dunay dugang importasyon nga makahimo og dugang kalihukan sa pagpadagan sa ekonomiya aron makapasulod og dolyares dinhi sa nasud.

Gibutyag nga ang pagkusog sa bili sa piso karon kontra sa dolyar makapabalik og kompiyansa sa mga negosyante nga nagduha-duha og pangapital sa milabay'ng tuig gumikan usab sa grabeng krisis sa politika ug hulga sa destabilisasyon.