3 ka eroplanong Balikbayan moabot para sa Sinulog

Tulo ka eroplano nga mga Balikbayan ang moabot karong adlawa dinhi sa Sugbo aron lang pagsaksi sa nabantog na nga tinuig nga Sinulog mardi gras sa Enero.

Sila si Konsehal Arsenio Pacana, tsirman sa committee on tourism, Bise Mayor Michael Rama ug ang mga opisyal sa Cebu City Tourism Commission ug mga representante sa Department of Tourism (DOT-7) maoy mosugat sa unang batch sa tulo ka mga eroplano nga mga Balikbayan nga motugpa diha sa Mactan Cebu International Airport karong alas 8:45 sa buntag.

Ang ikaduhang hugna sa grupo sa mga Balikbayan moabot sa Huwebes sa alas 11:45 sa buntag nga sugaton gihapon sa mga nahisgutang opisyal diha sa maong airport.

Gibutyag ni Pacaña nga nisaka og 10 ngadto sa 15 porsiyento ang gidaghanon sa mga Balikbayan nga mopauli sa Sugbo atol sa Sinulog karung tuiga itandi sa mga nangaging katuigan.

Gihulagway usab sa konsehal nga labing una usab karong tuiga nga dunay mobakasyon dinhi sa dakbayan nga mga turistang Russian aron lang mosaksi sa Sinulog.

Samtang gibutyag usab sa konsehal nga misaka og 30 ngadto sa 40 porsiyento ang mga langyaw nga turista nga mibakasyon sa Sugbo karong tuiga ug gipaabot pa kining mosaka nunot ning pipila pa ka nahabiling mga adlaw sa dili pa ang Sinulog mardi gras sa Domingo.

Gitumbok sa konsehal nga hinungdan sa pagsaka sa mga Balikbayan ug turista dinhi sa dakbayan karong tuiga mao ang gilusad nga sales promotion sa DOT-7 diin gi-promote gyud og maayu ang Sugbo nga maoy usa sa labing maayo nga duawon sa mga turista nga gustong mobakasyon sa Pilipinas.

Laing gitumbok nga hinungdan sa konsehal nga humot ang Sugbo sa mga turista tungod kay malinawon kini itandi sa ubang mga lugar ug gawas pa wala usay mga kalamidad sama sa hulga sa sakit nga bird flu, tsunami ug uban pa nga makapahadlok sa mga turista.