Huwes sa 'shabu 11' uyon mga huwes armasan

Dakung uyon ang huwes nga nagkupot sa kaso sa 11 ka akusado nga nalambigit sa gitawag og Asia's Mega Shabu laboratory sa dakbayan sa Mandaue nga pakupton og armas ang mga sakop sa hudikatura.

Kini ang gipadayag ni Regional Trial Court Judge Marilyn Yap human sa pagpusil patay sa usa ka Sugbuanong huwes nga si Judge Henrick Gingoyon didto sa Bacoor, Cavite niadtong Disyembre 31.

"Although I don't own any (gun), I am in favor of arming judges for self-defense," nagkanayun si Yap.

Apan buot usab si Yap nga ang mga tawo mismo ang mohatag og seguridad sa mga huwes gumikan sa kadaghan sa ilang trabaho.

Si Yap usa lang sa mga huwes lukop nasud nga pabor nga padad-on sila og armas human sa pagpatay kang Gingoyon.

Gituohang may kalambigitan sa trabaho ni Gingoyon ang pagpusil patay kaniya.

Samtang ang Integrated Bar of the Philippines Cebu Chapter mipasar na og resolusyon nga nag-awhag sa hingtungdang mga awtoridad nga taralon gyud ang utok sa pagpatay kang Gingoyon.

Kini aron mahatagan na og hustisya ang iyang kamatayon. Nanghinaut ang IBP nga ang unom ka suspek nga nangadakpan na dili lang mga fall guys sama sa nahitabo sa ubang mga kaso.

Gipasabot sa kadagkoan sa IBP nga dunay posibilidad nga aron lang madali sa kapolisan ang pagsulbad sa susamang kaso, dili mao ang ilang madakpan ug pugson kini sa pagpaangkon sa krimen.