Devotee city manglista na'g gustong mamuyo

Mosugod na sa pagpanawat og mga aplikante ang Devotee City nga nahimutang sa may Plaza Independencia siyudad sa Sugbo sugod sa alas 3:00 sa hapon sa adlaw'ng Huwebes.

Ang mga dumudoung gikan sa lainlaing lugar gawas sa Sugbo nga mga debotos ni Senyor Santo Niño nga moanhi sa dakbayan aron pagsaksi sa Sinulog Mardigras karong Domingo apan walay kaabtan maoy prayoridad nga makapahimulos niini.

Gibanabanang dili mominos 1000 ka mga aplikante ang ma-accommodate sa maong Devotee City nga libre na ang tubig, pagkaon ug kuryente.

Atol sa press conference kagahapon sa buntag gibutyag ni Konsehal Jocelyn Pesquera, chairman sa mga kalihukan, nga estrikto nilang ipatuman ang mga lagda ngadto sa mga dumudoung sama sa dili pagtugot niadtong mga benepisyaryo nga mag-sleeveless, mag-tsinilas ug mag-short lang.

Labaw nang walay gitugot nga maka-inom-inom diha sa sulod sa hawanan sa devotee city ingon man walay gitugotan nga makadala og mga mahait nga hinagiban.

Dunay dili mominos 50 ka vans nga gipahulam gikan sa Aboitiz ang gigamit karon nga mga temporaryong pinuy-anan sa mga debotos gikan sa lainlaing lugar nga motuyo og anhi sa dakbayan apan walay kapuy-an.

Karong Biyernes makahimo nang maka-check in ang mga benepisyaryo hangtud sa pagka-Lunes sa udto sa liwas na sa Sinulog.

Tumong ug tuyo sa pagmugna sa Devotee City aron dunay kahigdaan ang mga debotos sa Señor Santo Niño gikan sa lainlaing lugar aron dili magpataka og higda diha sa sidewalk nga makadugang sa suliran sa trapiko ug labaw sa tanan malikay sa binuang.

Tukmang seguridad ang ipaangay sa kapolisan sa mga benepisyaryo niini ma-adlaw ug gabii.