Drayber, mekaniko patay sa aksidente

Gikatahong nagmanehong hubog nakapatay og drayber ug mekaniko ug miangol usab og usa dihang gidasmagan ang mga biktimang nag-ayo sa ilang naaberiyang sakyanan diha sa may tiilan sa First Mactan- Mandaue Bridge sa barangay Pajo, dakbayan sa Lapu-Lapu sa milabay'ng gabii.

Ang namatay giilang sila si Joenald Jutay, hingkod ang panuigon ug mekanikong si Leodegario Monteron alyas Pangag, samtang naangol mao ang konduktor nga manghod ni Jutay nga si Gilbert.

Gitumbok nga nakabangga sa mga biktima mao si Nicole Sandigan, 45, minyo ug molupyo sa Vista Villa sa Sitio Cagudoy, Barangay Basak sa samang dakbayan kinsa nahibaw-ang positibo nga nakainom sa dihang gi-liquor test sa mga doktor.

Si PO3 Danilo Aying sa pakighinabi sa Banat News nagkanayon base sa imbestigasyon ni SPO3 Bonifacio Sumalinog nga naaberiya ang pasaheroang multicab sa mga biktima dihang nabalian og "rear axle" niini pag-abot sa maong lugar.

Samtang gisusi sa tulo ang daut nga parte sa multicab diha sa ilawom kalit nga misakdap kanila ang usa ka abuhon og kolor nga Honda Civic nga "for registration" ang plaka.

Sumala pa sa mga saksi nangalamba ug naparok sa sementadong dalan ang mga biktima atol sa pagbangga, daling gidala sa Mactan Doctor's Hospital ang mga biktima apan gideklarar nga dead on arrival si Joenald, kagahapon sa alas 9 pasado sa buntag nakabsan usab og kinabuhi si Monteron diha sa tambalanan sumala pang Aying.

Gitug-an ni Aying sa Banat News nga pito palang ka adlaw gikan napalit sa suspek ang iyang sakyanan maong wala pa kini numero sa plaka.

Si Aying miingon nga si Monteron nakaangkon og grabeng kadaut sa lawas ug ulo maong nakabsan kini sa kinabuhi diha na sa tambalanan. Samtang nagtingkagol na karon sa karsel sa Lapu-Lapu City Police ang suspek.