Ang aksidente nahitabo alas 8 pasado ang takna sa miaging gabii sa dalan Java sa Mactan Air Base (MAB) siyudad sa Lapu-Lapu.
Ang namatay mao si Susan de Mayoga, 39 anyos, minyo nga nagpuyo sa sulod sa compound sa air base ug lumad nga taga Daantayan, Cebu.
Ang nakadasmag mao ang Tamaraw nga sakyanan nga gimaneho ni Eliazar Beconada, 46 anyos, minyo nga taga Seaweeds, Pusok sa maong dakbayan ug kanhi sakop sa PAF nga nadestino sa airbase.
Si P01 Christian Torres nga gikahinabi sa Banat News miingon nga milabang ang biktima sa pikas habig sa karsada sa maong dapit.
Ang sakyanan ni Beconada nga kusog nga nagdagan subay sa maong dalan kalit lang midasmag sa biktima nga maoy hinungdan sa pagkalamba niini sa sementadong karsada.
Gidala unta ang biktima sa sulod sa airbase apan ang mga doktor mideklarar niini nga patay na kining nahidangat kanila.
Ang suspek nga nakadasmag sa biktima mitahan sa kapolisan sa maong dakbayan ug gitanggong karon sa sulod sa bilanggoan ug nagpaabot sa ipasaka ang kaso.