Motor misaliring; 2 patay

Patay ang managsuon human mosaliring sa karsada ug naligsan sa usa ka trak ang ilang gisakyang motorsiklo niadtong milabayng Sabado sa hapon diha sa National Highway sa Sitio Eme, barangay Damulog lungsod sa Sogod.

Wala na makaabot sa tambalanan nga buhi ang mga biktimang sila si Eugene Flores, 20, ug manghod niining si Emily Flores,13, pulos nagpuyo sa Sitio Bangisan, barangay Liki sa samang lungsod.

Sumala pa ni SPO1 Stanley Canoy sa Cebu Provincial Police Office Operations division sa pakighinabi sa Banat News nga padulong ang managsuon sa barangay Poblacion dihang nahitabo ang aksidente.

Matud pa niya nga kalit lang natumba ang gimanehong Kawasaki Aura nga gimaneho ni Eugene ug nasaliring kini pangadto sa walang bahin sa kalsada diin gikasugat ang Fuso canter nga gimaneho ni Olympio Lagrado Jr., 40, minyo ug molupyo sa Tigbawan lungsod sa Tabuelan.

Sigun pa sa kapolisan wala na makabantay ang drayber sa trak dihang napasok ang motorsiklo ug mga biktima diha sa iyang trak, dihang nadala sa Sogod District Hospital ang mga biktima gideklarar kining dead on arrival.

Samtang mitahan sa iyang kaugalingon si Lagrado human sa hitabo ug gikatakdang pasakaan karon og kaso.