Away sa 2 ka sitio mikalas na'g USA

Panag-away sa pipila ka mga residente sa duha ka sitio diha sa barangay Sambag Dos ning dakbayan usa ang nakalas kagahapon sa kaadlawon nga usa ka balot vendor diha sa may dalan General Maxilom ning dakbayan.

Duha ka bala diha sa ulo ang mitapos sa kinabuhi ni Christopher Ansoa, 29, minyo ug molupyo sa Sitio Kawayan, barangay Sambag Dos human kini gipusil sa duha ka wala mailhing mga lalaking luwan sa usa ka motorsiklo samtang kini naglingkod sa daplin sa dalan ug nagpaabot og kustomer diin.

Sumala pa sa mga saksi nga miabot ang mihunong nga motorsiklo diha sa tungod sa biktima ug ang backrider mikanaog ug miduol sa biktima ug walay daghang pangutana gipusil sa ulo si Ansoa duha ka higayon.

Si SPO2 Alex Dacua nga maoy nag-imbestigar sa kaso nagdudang may kalambigitan ang pagpatay sa nahitabong tubag-tubag nga pagpamusil diha sa Sitio Upper ug Lower Kawayan sa Sambag Dos ning dakbayan.

Matud pa ni Dacua nga pipila sa mga residente ang nagbaharay sa usag usa human ang nahitabong nanglabayng pagpamusil, usa na niini ang nahitabong pagpusil sa usa ka polis ug duha ka mga molupyo diha sa maong dapit niadtong Disyembre 17, 2005.

Niadtong hitaboa naangol sila si PO1 Ronelito Montañez sakop sa Cebu Provincial Police Office, Operations Division, uban nila ni Roy Cadalen ug Juanito Atoy dihang gipamusil sa magsuong naila lang nga sila si Micmic Rico ug Baroy Rico nga armado ug 9mm kalibreng pistola ug pugakhang. Si Montañez igo lang miresponde sa alarma dihang gisugat kinig bala sa mga suspek.

"Sa akong tan-aw dili ni vigilante style killing kay wala man magtaptap sa nawong ang mga suspek. Akong duda related ni sa kaso adtong pagpamusil sa Sitio Kawayan diha sa ila kay duna man kunoy bahad sa biktima previously, nagsugod man ang ilang away adtong dunay gipamusil diha sa ila, pero wala pa ta makasiguro kun mao ba gyud," asoy pang Dacua kinsa wala mohatag kung unsay kalambigitan sa biktima sa mga nag-unang hitabo sanglit kasamtangan pang gihimo ang dugang imbestigasyon.

Diha sa crime scene narekober ang duha ka basiyo sa kalibre 45 nga bala samtang nangikyas ang mga suspek subay sa dalan Jakosalem ning dakbayan.