Di sub-standard ang materyales

Gihimikak sa Talisay City engineers ang taho nga sub-standard ang gigamit nilang materyales sa gihimong lane separator diha sa national high-way sa Barangay Bulacao dakbayan sa Talisay.

Ang maong separator adunay duha ka-phase ug ang phase 1 pa maoy nahuman nga dunay budget nga P2 milyones.

Ang phase 2 wala pa masugdi tungod kay nagkinahanglan pa kini og laing budget.

Ang pikas tumoy sa nahisgutang lane separator nabuak tungod kay nadasmagan og sakyanan apan walay nakakita sa responsable hinungdan nga ang dakbayan maoy miabaga sa gasto para sa pagpa-repair niini.

Si Talisay city engineer Audie Bacasmas nagkanayon nga dili tinood nga sub-standard ang materyales niini tungod kay walay sub-standard nga materyales.

Hinuon ang disenyo niini maoy sub-standard diin ang una niini usa ka center island nga dunay landscape sa kilid apan gi-usab.

Matud pa ni Bacasmas nga sub-standard ang gilapdon sa karsada og dili na kini angayang butangan og landscape sa kilid sa maong separator para dili mosamot ang kahuot sa dalan.

Si Bacasmas midungag nga nahimo usab nga babag ang maong lane separator aron maglikay sa aksidente ang mga motorista.