Dugang patrol cars sa summit

Mga sakyanan sa Mandaue City Police Office (MCPO) giplanuhang dugangan atol sa gikatakdang South East Asian Nation (ASEAN) Summit sa Disyembre niining tuiga.

Kini ang gipadayag ni Mayor Thadeo Ouano sa pagpakighinabi sa Banat News kagahapon.

Matud pa niya nga ang 26 ka mga sakyanan nga giabangan sa kagamhanan sa RDAK Transport Equipment Inc. nga mokabat sa P10 milyones ang kantidad ang pun-an pa atol sa ASEAN Summit.

Matud pa ni Ouano sa pagkakaron ang walo ka Nissan Terrano ug ang 15 ka multicab maoy gigamit sa kapolisan alang sa pagpatrolya sa kabarangayan ug sa tibuok dakbayan.

Samtang ang bag-ong direktor sa Mandaue City Police Office (MCPO) nga si Senior Superintendent Eduardo Catabas miingon nga ilang sugdan ang security plan alang sa maong kalihokan.

Nag-una sa plano mao ang kasigurohan nga luwas ang 17 ka mga lider sa unang nasud ug mga delegado niini.

Matud pa ni Catabas nga makigbayloay usab ang iyang buhatan sa mga hunahuna sa uban pang kuwerpo sa kapolisan ug kasundalohan aron gayod sa pagpalig-on sa siguridad atol sa maong kalihokan.