Kuyaw sa sunog ipasusi

Gimanduan sa over-all chairman sa Sinulog Foundation Bise Mayor Michael Rama ang mga sakop sa kabomberohan nga mohimo og pakisusi aron matumbok ang mga lugar nga peligro sa sunog ilabi na atol sa Sinulog mardi gras.

Mao kini usa sa gituki atol sa sinemanang tigum sa Police Coordinating and Advisory Council (PCAC) kagahapon.

Tinguha ni Rama nga magdestino si Cebu City Fire Marshal Supt. Esmael Codilla ug mga fire trucks sa mga lugar nga peligro sa sunog ilabi na diha sa mga rota nga agian sa parada sa Sinulog aron dili unya kini makahatag og kahasol sa maong kalihukan.

Apil na niini ang tibuok rota nga agian sa prosesyon atol sa bisperas sa Sinulog pagka adlaw'ng Sabado og ingon man sugod niining mga semanaha diin pormal nang gibuksan Sinulog 2006 kagahapong adlawa.

Karong sunod semana i-finalize na sa PCAC ang pagpatuman sa seguridad alang sa Sinulog mardi gras diin apil sa pakigtagbuan ni Rama mao ang tanang mga hepe sa nagkalainlaing police station dinhi sa dakbayan.

Apil sab sa ipakatap mao ang mga tanod sa kabarangayan ug mga anti crime volunter groups nga maoy tahasan nga mopatunhay sa kahusay ug kalinaw sa adlaw sa mardi gras.

Nasayran nga niadtong mga milabay nga katuigan sagad dunay motumaw nga alarma sa sunog ang mahitabo sa mga eskuwater nga lugar ilabi na diha sa Pasil area.