Guardo wa gihapon patuo sa pasidaan gikang Tomas

Wala gyud mopatuo ang kanhi tsirman sa Cebu City Sports Commission Jonathan Guardo sa pasidaan ni Mayor Tomas Osmeña nga magpakahilum na lang kini og dili motingog hangtod nga makahatag og husay sa tanang nagasto sa pagpahigayon dinhi sa Sugbo sa pipila ka mga dula sa milabay'ng 23rd Southeast Asian Games.

Kagahapong adlawa, si Guardo misumbalik hinuon og sukna sa mayor dihang nagpa-interview sa usa ka estasyonan sa radyo kun nakabayad na ba ang siyudad sa Sugbo sa utang niini ngadto sa mga hotel dinhi sa dakbayan nga maoy gi-estahan sa mga atletang Pilipino.

Gibutyag ni Guardo nga subay sa kasabutan tali sa PhilSOC ang siyudad sa Sugbo maoy mo-abaga sa gastuhan sa accommodation sa mga local athletes hinungdan nga migahin ang dakbayan og P2 milyones.

Giluwatan kining maong pamahayag ni Guardo human siya makadawat og daghang tabi tabi nga duna gihapoy mga hotel dinhi sa dakbayan ang wala mabayri sa siyudad.

Nunot niini, giinsister sab ni Guardo nga dili siya obligado nga mohatag og husay ngadto kang Osmeña kabahin sa kinatibuk-ang nagasto sa 23rd sea Games dinhi sa Sugbo gumikan kay ang iyang gahin nga gigamit naggikan man sa nasudnong kagamhanan nga gipaagi sa PhilSOC.

Nasayran nga si Guardo mao sab kini tsirman sa CebuSOC sa milabay'ng Sea Games.

Gibutyag ni Guardo nga sila si Konsehal Jack Jakosalem ug Konsehal Jocelyn Pesquera maoy angay pangayoan og husay sa mayor kabahin sa kinatibuk-ang nagasto sa siyudad sa milabay'ng kalihukan gumikan kay mao man kini nagdumala sa gigahin nga pundo sa siyudad.

Nagtuo si Guardo nga politika ang hinungdan ning pagkabutang karon niya sa kontrobersya human una nang mitumaw ang mga estorya nga nagplano kining molansar pagka kongresista sa habagatang bahin sa siyudad sa Sugbo.