Mga "kawatan" og kable nasikop

Nasikop ang mga kawatan sa pagpamutol sa linya nga aluminum ug bronze nga alambre sa Globe didto sa barangay Pungtod, Valladolid, Carcar, Cebu, kaniadtong kaadlawon sa Enero 4, 2006.

Sa taho ni Senior Inspector Siclot sa Carcar Police Station ngadto sa Banat News nag-ingon nasikop nga mga kiriwan mao sila si Danny Aldolana Paran, 36, minyo ug molupyo sa Mananga, Tabunok, Talisay City, Michael Alagado, 30 anyos, ug Orlando Gallera, pulos mga molupyo sa Mangga II sa samang dapit.

Ang mga suspetsado nasikop sa mga sakop sa Pungtod, Valladolid barangay tanod pinangulohan ni tanod chief Allan Balawido.

Sumala pa ni Siclot, ang mga suspetsado naaktuhan gayod sa mga tanod nga namutol sa aluminum ug bronze wire sa linya sa Globe. Nakuha ang mga pinutol nga alambre, sundang, cutter, plier, usa ka Nokia 3310 cellephone, pitaka nga itom may sulod nga cash nga P224.25, driver's license nagdala sa ngalang Jerome Rivera Fernandez, fatigue baseball cap, OR sa motorsiklo may ngalan nga Perlita Andolana.

Ang mga dinakpan gidala sa mga kadagkoan sa Globe inubanan sa kapolisan sa Carcar ngadto sa Cebu City aron kini sila pasakaan ug sumbong sa pagpangawat.