Namoso sa Talisay College gidakop, gibuhian dayon

Gibuhian sa blue guard sa Talisay city hall ug wala makuhai og pangalan ang usa ka tawo kinsa gipasanginlang namuso sa usa ka staff sa Talisay City College nga nangihi sa pansayan sa babaye atbang sa buhatan sa SP Secretary niadtong Martes sa hapon.

Nagkagubot ang mga empleyado sa city hall sa Talisay tungod sa maong hitabo sumala pa ni Rogelio Villaver labaw sa Civilian Security Unit kinsa nagkanayon nga ang maong insidente kanunay na nga mahitabo sa milabay'ng tuig diin daghan na ang mireklamo nga mga kawaning babaye sa city hall nga busohon samtang mangihi apan wala silay masikop nga suspetsado tungod kay dali kaayo kining makaikyas.

Ang ulahing biktima mao si Malou Delima, 26-anyos, TCC staff, kinsa gisugo ni TCC Director Tomas Ramos paghatud og mga dokumento diha sa city hall.

Kalit nga misinggit si Delima dihang nakita niini ang usa ka tawo kinsa mikatkat sa cubicle sa pansayan nga iyang nahimutangan og gilili siya niini.

Atol sa maong insidente ang pag-agi ni Almond Dela Piña, staff sa city engineer, hinungdan nga gisita ug gisikop ang tawo ug gitugyan ngadto ni Abe Sepriano, blue guard sa city hall.

Si Dela Piña misaka ngadto sa taas sa city hall diin gipangita niini si Delima para ipaatubang niini ang suspetsado nga gibiyaan ni Sepriano.

Apan matud ni Jocelyn Ycong supervisor sa blue guard nga gibuhian ni Sepriano ang suspetsado tungod kay isog kaayo kining namalibad nga walay sala.