Sunog sa Mandaue usa naangol

Sunog sa dakbayan sa Lapulapu niadtong milabayng Lunes gitubag usab og sunog kagahapon sa dakbayan sa Mandaue diin giugdaw ang unom ka balay ug nakamugna og kadaut sa usa pa ka balay ug miangol sa usa ka residente.

Ang sunog miigo diha sa barangay Opao sa nahisgutang dakbayan alas 3:11 diin girespondehan kini dayon sa kabomberuhan gikan sa mga sikbit nga dakbayan.

Si SFO1 Roy Garcia sa pakighinabi sa Banat News nagkanayon nga anha nagsugod ang sunog sa panimalay ni Cerilita Batiro,54,anyos kinsa nakaangkon og 2nd degree burn sa duha niya ka tiil gumikan sa pagsuway niini og pawong sa kalayo diha sa foam nga higdaanan sa iyang anak.

Kasagaran sa mga panimalay ginama sa kahoy maong dali kaayong nakatakod sa mga sikbit nga kabalayan, samtang nagkaproblema usab ang unang mirespondeng trak sa bombero gumikan sa pagkalubong niini sa piot kaayong agianan.

Swerte nalang nga taas ang nadalang hose sa maong trak ug nakaabot sa fire scene ug dali usab nga nangabot ang ubang mga mirespondeng bombero nga misumpay-sumpay sa ilang mga hose.

Usa ka Grace Lee maoy mitawag sa buhatan sa Mandaue City Fire Department nga dunay sunog nga nahitabo sa ilang barangay.

Gibana-banang P500, 000 ang danyos sa maong sunog nga milanat lang og singko minutos.

Kini maoy tubag sa sunog nga miigo sa barangay Mactan Proper sa dakbayan sa Lapulapu niadtong Lunes sa hapon diin gilamoy ang P1.2 milyones nga danyos lakip na ang duha ka mga pabrika sa mga muwebles.