Ate Glo kaabot sa 2010 bisan samok, panagna

Usa ka manalagna sa Sugbo ang nitug-an nga makahuman gyud si Presidente Gloria Macapagal Arroyo sa iyang termino hangtud sa tuig 2010.

Kini bisan pa sa kasamok sa politika sa nasud ug ang krisis nga giatubang sa iyang administrasyon.

Ang enhinyero nga nahimong manalagna nga si Lilia Colina mitug-an sa ABS-CBN DyAB Pasada Kinse Dose nga daan na niyang gitagna si Arroyo nga magpabilin sa renda hangtud sa tuig 2010 human siya nilingkod sa katungdanan sa tuig 2001 hulip sa napalagpot nga si kanhi Presidenti Joseph Estrada.

Gani nabalaka si Colina nga dili matuman ang iyang tagna sa dihang nipahibawo si Arroyo nga dili na modagan sa pagka presidenti niadtong eleksiyon sa tuig 2004.

"When she (PGMA) announced her plan not to run, I was afraid that people would think of me as a liar, but when she changed her mind and ran for president, I was so happy," matud pa ni Colina.

Gitagna usab ni Colina nga moarang-arang ang ekonomiya sa nasud karong tuiga.

Mipahimangno usab siya labot sa hulga sa seguridad nga makapahadlok sa mga negosyante sama sa mga pagpangatake sa mga terorista ug kudeta sa kauluhan.

Dugang pa niya nga makasinati gihapon ang nasud karong tuiga og mga kalamidad sama sa sunog ug mga aksidenti.