Junkshop gireklamo sa mga residente

Usa ka junkshop diha sa Golden Valley Homes, sa Laguerta barangay Lahug ang gireklamo sa silingang magtiayon gumikan sa gihulagway nga mga peligrosong mga butang nga gitambak niini.

Sila si Engineer Manuel ug Nenita Ompok sa maong dapit mipadangat og reklamo diha sa buhatan ni Konsehal Eduardo Labella gumikan sa giingong peligro sa panglawas sa mga gipangtambak sa maong junkshop.

Ang maong junkshop gipanag-iya sa usa ka Nerissa Gorne nga gitukod niadto pang 2004 alang sa buy and sell business niini diin ila rang gipasagdan bisan gisandigan ang ilang koral sa mga napalit nga mga scraps ni Gorne.

Apan ning bag-ohay lang nakadesider ang mga residente uban sa banay'ng Ompok sa pagpaabot na sa reklamo ngadto sa kagamhanan gumikan sa ilang gikahadlukang posibleng sakit nga makuha gumikan sa mga scraps diha sa palibot.

Si Labella sa iyang bahin nagkanayon nga dunay rason ug igong kapasikaran ang reklamo sa mga Ompok gumikan kay residential ang maong lugar ug dili commercial area ug gikinahanglang pangitaan kinig paagi sa dakbayan.

Samtang gibutyag usab ni Labella nga tukion nila ugmang adlawa sa sesyon sa Konseho ang awhag nga paimbestigahan sa Cebu City Health Office ang mga establisamentong namalit og mga scrap iron ug uban pang mga junk materials kun duna bay peligro sa katawhan ang presensya niini sa mga residential areas.