Bayot gipatay sa adik

Usa ka bayot nga wala makahatag og shabu ngadto sa adik nga lalaki nga bayad sa gihimong pagpakighilawas niini gipatay alas 12 pasado sa tungang gabii sa Bag-ong tuig didto sa sitio Kulo sa barangay Canjulao sa dakbayan sa Lapu-Lapu.

Ang biktima mao si Edwin de Leon, alyas Bayot, 31 anyos, lumad nga taga Kamagayan sa dakbayan sa Sugbo nga mibisita lamang sa higala sa maong dapit alang sa pagpamag-ong tuig.

Ang suspetsado mao si Danilo Pahimutang, 26 anyos, ulitawo nga nagpuyo sa maong dapit mitahan usab kang Barangay Kagawad Alfredo Abas nga iyang uyoan kinsa mao usab ang mitugyan niini sa kapolisan.

Si PO3 William Humoc sa homicide section nga gikahinabi sa Banat News miingon nga alas 5 na sa buntag niadtong Bag-ong tuig nga napalgan sa mga lumolupyo ang patay'ng lawas sa biktima.

Matud pa niya nga naglunang kini sa kaugalingong dugo nga nagbuy-od sa yuta ug nakaangkon og dakong kadaut sa ulo nga gituohang naigo sa gibunal nga magahing butang.

Dugang pa ni PO3 Humoc nga ang suspetsado nga ilang gisukitsukit mitug-an ngadto kanila nga gisukmag niya ang biktima nga maoy hinungdan sa pagkatumba sa karsada ug nabunal ang ulo niini.