CPPO motabang sa Gingoyon case

Andam motabang ang kapolisan sa lalawigan sa Sugbo sa imbestigasyon sa kasong pagpatay sa Sugbuanon nga huwis sa Pasay City nga Judge Henrick Gingoyon.

Kini ang gipadayag ni Sr. Supt. Vicente Loot, hepe sa kapolisan sa lalawigan sa Sugbo.

Matud pa ni Loot nga posibli nga mangayo og tabang ang mga imbestigador sa kaso gikan sa kauluhan aron pagsubay sa rekord ni Gingoyon.

Daku ang pagtoo ni Loot nga ang mga kaso nga gikuptan ni Gingoyon sa dihang usa pa siya ka piskal sa Sugbo ang lakip sa subayon sa mga imbestigador.

Hinoon maghuwat lang si Loot nga mohangyo na ang mga imbestigador gikan sa kauluhan.

Gipasalig ni Loot nga andam ang iyang buhatan sa paghipos sa mga impormasyon nga kinahanglanon sa mga imbestigador.

Nasayran nga nimando na ang Malacañang ngadto sa kapolisan sa paghimo sa imbestigasyon ug pag-ila sa suspek.

Si Gingoyon, 53, naglakaw gikan nag-workout sa gym sa dihang gipusil sa duha ka tawo kinsa luwan sa motorsiklo sa may Soldiers Hill, barangay Molino, Bacoor, Cavite niadtong Sabado sa hapon.

Si Gingoyon ang nimando sa kagamhanan nga mobayad og P3-bilyones ngadto sa Philippine International Air Terminals Co. (Piatco) alang sa Ninoy Aquino International Airport Terminal 3.

Ang kagamhanan maoy mo-takeover sa NAIA-3 nga wala magamit human kini nakompleto dul-an na sa duha ka tuig ang nakalabay.

Daghan pang kontrobersiyal nga kaso ang gihukman ni Gingoyon.

Ang mga imbestigador mikompirmar nga duna nay hulga ang kinabuhi ni Gingoyon sa buhi pa kini.