NPA nagbakasyon sa Danao nadakpan sa 78th IB

Usa ka gisuspetsahang sakop sa New Peoples Army ang nasikop sa hiniusang puwersa sa 78th Infantry Batallion ug kapolisan sa Danao City police diha sa barangay Sabang dakbayan sa Danao niadtong Domingo sa kaadlawon.

Gi-aresto mao si Teodoro Sericon, hingkod ang panuigon kinsa nagtago-tago sa awtoridad gumikan sa upat ka kasong murder nga giatubang niini diha sa lungsod sa Carmen.

Sumala pa ni Chief Inspector Larson Dechino sa pakighinabi sa Banat News ang mga sakop sa 78th IB intelligence unit pinanguluhan ni 2Lieutenant Lorenzo Ciobal maoy nakasigpat kaniya diha sa Barangay Sabang niadtong adlawa.

Matud pa nangayo og back-up ang militar aron arestuhon si Sericon sa maong dapit pinanguluhan ni SPO3 Ramerito Ramoneda, hinuon wala mopakita'g pagsukol ang suspek dihang gialirongan sa militar ug kapolisan ang balay nga gibakasyonan niini.

Dunay upat ka warrants of arrest sa kasong murder ang suspek gikan sa sala ni Regional Trial Court Judge Silva Paderangga nga giingong kaso niini didto sa Carmen.

Dugang pa ni Dechino ang suspek nasikop na nila usa na ka tuig ang milabay apan gibuhian gumikan sa kapakyas nga mokonektar ang tawo diha sa warrant of arrest ug sa suspek gumikan kay "John Doe" man ang pangalan niini.

Sumala pa ni Dechino gipa-amendar ang warrant of arrest maong naaresto na karon si Sericon, sumala pa niya nga dihay mga impormasyong nag-ingong dunay kalambigitan sa pagpanunog og bus ang suspek kaniadto apan giangkon niyang dili kini kumpirmado.

Si SPO3 Edgar Gomez sa pakighinabi nagkanayon nga gisuspetsahan usab ang suspek nga maoy usa sa mga misulong sa barangay Cawrasan sa lungsod sa Carmen diin gisulong ang detachment sa Army.