DPS naglisud panghipos

Naglisud na pag-atiman og hipos ang Department of Public Services (DPS) sa mga nagtipon-og nga mga basura dinhi sa dakbayan sa Sugbo human sa pagsaulog sa Pasko.

Kini gumikan kay gawas nga kapin na lang sa napulo ka mga garbage trucks ang nagdagan sa DPS gumikan kay ang uban niini nangaguba gikonpirmar ni Konsehal Edwin Jagmoc tsirman sa Committee on Public Services nga midaghan usab karon og maayo ang volume sa basura nga hiposonon matag adlaw.

Wala hinuon makakuha og saktong figure ang konsehal kun pilay porsiyento sa pagdaghan sa mga hiposonon nga basura ang nasinati karon dinhi sa dakbayan.

Gumikan niini, gipa-estambay karun ang tanang mga open dump trucks gikan sa Department of Engineering human nakig-alayon ang konsehal sa maong departamento aron motabang og hakot sa mga lugar nga mabiyaan ang paghipos sa nagtipun-og nga mga basura.

Apan giklaro sa konsehal nga sa panahon lang usab sa kagabhi-on mahuwaman nila ang maong mga dump trucks gumikan kay gamiton man usab kini sa maong departamento sa adlaw.

Gituohan sa konsehal nga magpadayon ang ilang suliran nga atubangon gikan sa mga nagtipun-og nga mga hiposonong basura hangtud pa unya kini sa Sinulog mardi gras.

Gibutyag sa Konsehal nga dili unta sila makasugat niining maong suliran kon wala pa malangay ang pag-deliber sa gipalit sa siyudad nga pito ka mga garbage trucks nga gigahinan og P11 milyones nga gitakdang unya pa sa Febrero mo-abot.

Subling gipasidan-an sa konsehal ang mga basurero ug garbage collectors nga angayon ang paghipos ug basura og dili pilion ug labaw nang dili mag-solicit sa mga nanag-iya og establisamento bugti sa paghipos sa basura niini.